Ráðherra viðskipta- og þróunarmála í finnsku ríkisstjórninni, Paavo Väyrynen, lýsti þeirri skoðun sinni í samtali við finnska dagblaðið Helsingin Sanomat í gær að það hefðu verið mistök af hálfu Finna að taka upp evru á sínum tíma í ljósi þess að nágrannar þeirra Svíar kusu að gera það ekki. Þannig hefði t.a.m. finnskur skógarhöggsiðnaður átt verulega undir högg að sækja undanfarin ár á sama tíma og sami iðnaður hefði blómstrað í Svíþjóð. Ástæðan væri hátt gengi evrunnar sem hefði hentað finnskum útflutningi illa á sama tíma og gengi sænsku krónunar hefði aukið samkeppnishæfni sænsk útflutnings.
Þann 20. apríl sl. sagði aðalhagfræðingur Útflutningsráðs Svíþjóðar, Mauro Gozzo, í samtali við sænska ríkissjónvarpið að útflutningsverðmæti Svía hefðu aukist árlega um 30 milljarða sænskra króna (um 450 milljarða íslenskra króna) þar sem þeir hefðu kosið að halda í krónuna í stað þess að skipta henni út fyrir evru. Ennfremur sagði hann að ef gengi krónunnar hefði verið mjög hátt, eins og gengi evrunnar hefði verið, hefði efnahagskreppan komið miklu harðar niður á Svíum og atvinnuleysi t.a.m. aukist hraðar.
Fyrir utan þá reynslu Finna að gengi evrunnar taki ekki mið af þörfum finnsks efnahagslífs þá vaknar sú spurning hver samkeppnisstaða íslensks sjávarútvegar kynni að verða ef Íslendingar gengju í Evrópusambandið og tækju upp evruna en Norðmenn stæðu áfram fyrir utan sambandið með sína norsku krónu?
Heimild:
Väyrynen: Euro oli virhe Suomelle (Hs.fi 30/04/09)
Tengt efni:
Svíar betur settir með sænsku krónuna en evru
